Тилдер

Аллах: "Мен силер менен биргемин

"Алар Куран жөнүндө ой жүгүртүшпөйбү?! Эгер ал Аллахтан башканын сөзү болгондо, анда алар Курандан көптөгөн карма- каршылыктарды табышаар эле." (Ниса сүрөөсү 82-аят)

Намаз убактысы

Багымдат
04:43
Күн чыгышы
06:24
Бешим
13:02
Аср
17:43
Шам
19:46
Куптан
21:01

Ирандын Маданий өкүлчүлүгү Бишкекте Ноорузга карата майрамдык иш чара өткөрдү

19-мартта Т. Абдымомунов атындагы Кыргыз улуттук драма театрында Иран Ислам Республикасынын Кыргызстандагы элчилигине караштуу Маданий өкүлчүлүк тарабынан Ноорузга карата майрамдык салтанат өткөрүлдү.

Кыргызстандагы ирандыктар, Бишкек шаарынын жашоочулары жана студенттер менен мектеп окуучулары катышкан бул иш чарада Нооруздун тарыхы менен мааниси жана ар кайсы элдердин достугун бекемдеп, улуттук баалуулуктарын арттырган касиети айтылып, Ирандан келген артисттердин, Б. Бейшеналиева атындагы маданият жана искусство университетинин студенттеринин аткаруусундагы театралдаштырылган оюн-зооктор коюлуп, ырлар жаңырды.

Алгач сөз сүйлөгөн Ирандын Кыргызстандагы Толук жана ыйгарым укуктуу элчиси Али Можтаба Рузбехани иш чаранын баардык катышуучуларын Нооруз майрамы менен куттуктап, иштерине ийгилик, чың ден соолук каалады. “Учурдан пайдаланып баардыгыңыздарды табиятка жаз мезгилин, адамдардын жан дүйнөсүнө жаңыланууну алып келген Нооруз майрамыңыздар менен куттуктаймын. Биздин ата-бабаларыбыздан бери белгиленип келаткан байыркы Нооруз Борбор Азия, Кавказ, Индия, Афганистан жана Иранда жалпы майрам болуп саналат. Ошондуктан Нооруз бул элдердин башын бириктирген ынтымак менен достуктун да майрамы болуп саналат. Бүгүн Сиздердин майрамдык маанайыңыздарды көтөрүү үчүн Ирандан атайын музыканттар келишти. Андыктан аларга терең ыраазычылык билдирип кетким келет. Ошондой эле кымбат убактыңыздарды бөлүп келип, Ноорузду чогуу белгилеп жаткан ар бириңиздерге рахмат айткым келет. Мындан тышкары бүгүнкү иш чараны уюштуруп жаткан Иран элчилигинин алдындагы Маданий өкүлчүлүккө, бул уюмдун жетекчиси Али Хакимпур мырзага да ыраазычылык пикиримди айткым келет. Ошол эле учурда бизге көмөк көрсөткөн Т. Абдымомунов атындагы Кыргыз улуттук драма театрынын жетекчилигине, КРнын маданият, маалымат жана туризм министрлигине, Афганистандын Кыргызстандагы элчисине ыраазычылык пикиримди айткым келет. Нооруз баардыгыбызга жакшылыктарды алып келсин”,- деди Али Можтаба Рузбехани.

Андан соң Ирандын элчиси жакында фарс тили боюнча окуучулар ортосунда өткөрүлгөн конкурстун жеңүүчүлөрүнө сыйлыктарды тапшырды.

Т. Абдымомунов атындагы театрдын директору Асылбек Өзүбеков өз сөзүндө Нооруздун мекени болгон Иран өлкөсүнүн элчилиги бул майрамды белгилеп жаткандыгына өтө кубанычта экендигин айтып, мындан ары да ар кандай иш чараларды өткөрө берүүгө театрдын эшиги ачык экендигин билдирди.

Ирандын Маданий өкүлү Али Хакимпур болсо сөзүн Нооруздун касиети менен адамдардын турмушуна тийгизген маанисинен баштады. “Ар бириңиздерди жер жарылып чөп чыккан, желин жарылып сүт чыккан Нооруз майрамыңыздар менен куттуктаймын. Биздин иш чарабызга күбө болуу үчүн келген баардыгыңыздарга ыраазычылык билдирем. Мен үй-бүлөм менен Ноорузду жакшы көрөм жана колдон келишинче жогорку деңгээлде белгилөөгө аракет кылам. Бул майрамдын маңызы душмандарды бириктирип, аймактардагы элдерди достоштурган, ынтымакты чыңдаган улуулугунда болуп саналат. Жыл сайын көптөгөн ар кайсы өлкөлөрдүн мусулман элдери Ноорузду белгилөө менен өз ара достугун бекемдеп келишет. ЮНЕСКО тарабынан да Нооруз адамзаттын материалдык эмес маданий мурастарынын тизмесине киргизилиши бекеринен болбосо керек. Өз кезегинде бул майрам ар бир элдин өзүнүн улуттук каада-салттарын камтып турат. Андыктан Ноорузду исламга каршы эмес деп айтууга толук акыбыз бар. Себеби айрым адамдар акыркы кезде Нооруз менен ислам динин бири-бирине карама-каршы коюп келатышат. Кантип эле өзүнө баардык гумандуулук менен улуттук баалуулуктарды камтыган Нооруз исламга каршы болсун? Бирок бул суроого жоопту ар бириңиздер өзүңүздөр табасыздар деп ишенем”,- деди Маданий өкүл.

Б. Бейшеналиева атындагы Кыргыз мамлекеттик маданият жана искусство университетинин ректору Мамашарип Чотонов өзү жетектеген окуу жай жыл сайын Ирандын Маданий өкүлчүлүгү менен биргеликте Ноорузду белгилеп келерине токтолуп, жалпы адамзаттын маданияты менен каада-салтынын бир бөлүгү болгон бул майрам бир гана кыргыз-иран элдеринин эмес, баардык улуттар менен мамлекеттердин ынтымагын бекемдөөгө чоң салым кошуп келаткандыгына токтолду.

Андан соң аталган окуу жайдын студенттери тарабынан даярдалган ыр, күүлөр аткарылып, кыргыз элинин Бешик тойунун наристени бөлөө, конокторду тосуп алуу жана чачыла таратуу сыяктуу ырым-жырымдары аткарылып, залдагы конокторго сүмөлөк таратылды.

Сахнага чыккан Ирандын Хорасан провинциясынын Балмабат кыштагынан келген “Сахра” ансамбли улуттук бийлерди аткарып беришсе, Ирандан келген дагы бир ырчы Сейдали Реза иранча “Менин Ираным” жана орусча “Ялла” ансамблинин “Чайхана” аттуу ырын аткарса, Б. Бейшеналиева атындагы маданият жана искусство университетинин 2-курсунун студенти Адыл Бакытбеков перс тилинде оркестрдин коштоосунда ырдагандыгы көрүүчүлөрдүн купулуна толду.

Кеченин соңу университеттин студенттери тарабынан даярдалган Фирдоусинин “Шахнаме” поэмасынан театрлаштырылган үзүндү менен аяктады.